Spagettí Skrímlið Fljúgandi

15.10.2007 | 19:38

Leggur kirkja Núðluleikans blessun sína yfir hjónabönd gagnkynhneigðra?

Margir hafa komið að máli við mig og spurt hvað Heilagur Núðluleiki hafi á móti giftingu gagnkynhneigðra. Mitt svar er að fyrir augliti núðlunnar eru allir jafnir, samkynhneigðir sem gagnkynhneigðir. En hjónabönd gagnkynhneigðra hafa ekki tíðkast gegnum tíðina og eru e.t.v. almennt litin hornauga af samkynhneigðum. En tímarnir breytast og mennirnir með og líður eflaust ekki að löngu þangað til gagnkynhneigð hjónabönd þyki eðlilegasti hlutur í heimi.

Trúmál og siðferði | Slóð | Facebook | Athugasemdir (2)

2.8.2007 | 09:56

Fækkun sjóræningja

Þarna hefur fækkun sjóræningja milli Íslands og Kanada augljós áhrif. Á þessu korti má sjá hvernig hiti hefur hækkað á öðrum svæðum þar sem sjóræningjum hefur fækkað:

...og núna bætist svæðið milli Íslands og Kanada við.

Á þessu grafi má sjá samband sjóræningja og hlýnandi veðurfars á jörðinni:

(fækkun sjóræningja frá árinu 1820)

Það má því segja að sjóræningjar færi Íslendingum skárra helgarveður.

	Hitabeltisstormurinn Chantal gæti bjargað helginni
Ábyrgðarmaður færslu Tilkynna um óviðeigandi tengingu við frétt

Trúmál og siðferði | Breytt s.d. kl. 10:00 | Slóð | Facebook | Athugasemdir (0)

1.8.2007 | 00:56

Núðluleikinn talaði til mín

Vinkona mín, Eydís hans Sibba, trúði mér fyrir því að heilagur Núðluleiki hafi talað til hennar. Hann sagði henni að opna sjónvarpsstöð og nefna hana MegaSpag. Hlutverk stöðvarinnar ætti að fela í sér að breiða út boðorð hans heilaga Núðluleika 30% af tímanum, hin 70% mættu fara í fræðslu um hvernig fækkun sjóræningja hefur áhrif á hlýnun jarðar.

Ég held hún Eydís eigi samt ekki eftir að verða mikið úr verki enda einhver mesti auðnuleysingi sem ég þekki og gagnslaus til allra verka.

Önnur góð vinkona mín, Dísa darwin eins og ég kalla hana reyndi að uppfræða mig um tilurð heimsins og hvernig "mannskepnan" var tilkomin. Sér til stuðnings notaði hún kenningu Darwins um að maðurinn sé bara skepna sem hafi þróast í milljónir ára örófi úr fiski. Notar sem rökstuðning steingervinga og slíkt. Þykir mér Dísa vinkona mín full einföld og auðtrúa. Það veit hver heilvita maður að Spagettí Skrímslið Fljúgandi skóp manninn og heiminn og plantaði svona steingervingum til að villa um fyrir þeim auðtrúa. Ég vona bara að Dísa átti sig um síðir hversu fáránlegur hennar málstaður er.

Já, þeir eru ennþá nokkrir sem trúa svona vitleysu. Lifið heil!
Ramen!

Trúmál og siðferði | Slóð | Facebook | Athugasemdir (0)

31.7.2007 | 02:32

Kisa læknast fyrir tilstilli bænarinnar

Snúlla, miðaldra læða úr vesturbænum, datt heldur betur í lukkupottinn um helgina. Til margra ára hafa slök liðbönd þjakað Snúllu og hefur hún þurft að haltra milli bakgarðanna. Lítil stúlka sá aumur á kisu og bað til hins heilaga Núðluleika að ráða bót á þessum kvilla kisu. Og viti menn.. fyrr en varði var kisa farin að hoppa og skoppa milli garða og leika við hverja sína tá. Heilagur Núðluleiki fer ekki í dýrgreinarálit frekar en fyrri daginn.

Trúmál og siðferði | Slóð | Facebook | Athugasemdir (0)

27.7.2007 | 15:44

Öll göng lokuð

Nú er því ver og miður fokið í flesta hellisskúta hjá Vestmannaeyingum. Fyrst deyr vinur minn sem ákvað að leysa þetta mál með leg-steina-göngum fyrir almætti Skrímslisins og Vestmannaeyinga (sjá fyrri færslu), og í kjölfarið hafa Kristjáni L. Möller fallist hendur.

Já, heilagur núðluleiki lætur ekki að sér hæða.

	Engin jarðgöng til Vestmannaeyja en ferðum Herjólfs fjölgað
Ábyrgðarmaður færslu Tilkynna um óviðeigandi tengingu við frétt

Trúmál og siðferði | Slóð | Facebook | Athugasemdir (0)

26.7.2007 | 18:56

Leg göng til eyja

Góður maður og vinur minn í trúni deildi því með mér eitt sinn að hann hafi fengið vitrun frá almættinu.

Hann sagði: "Hans heilagi núðluleiki snerti mig með pastasprota sínum þegar ég var í hellaskoðun rétt hjá Hellu. Ég var staddur einn djúpt inni í helli og fann skyndilega fyrir miklum andþyngslum og sortnaði fyrir augun. Fann sáran verk færast út í vinstri handlegginn, svo fann ég mikla pasta-lykt leggja um hellinn. Sagði svo djúp rafræn rödd við mig úr myrkrinu 'Tumi, safnaðu saman öllum legsteinum fólks sem sannanlega trúði á mig og byggðu göng til vestmannaeyja!'. Ég veit fyrir víst að þetta var skapari vor sem mælti svo! Ég mun ekki linna lagningu þessari fyrr en lokin er eða ég ligg örendur"

Þessi vinur minn var tiltölulega nýbyrjaður á að safna saman legsteinum er hann fékk hjartaáfall og dó. Já, ég ætla að legsteina prófraunin hafi eingöngu verið prófsteinn á trú hans á almætti Spagettí Skrímslisins Fljúgandi. Það er aldrei að vita nema við sjálf séum einmitt að standa slíka prófraun á þessari stundu og því er mikilvægt að leggja rækt við trúna öllum stundum.

R'amen

Trúmál og siðferði | Slóð | Facebook | Athugasemdir (0)

25.7.2007 | 18:30

Höldum hvíldardagana heilaga

Spagettí Skrímslið Fljúgandi boðar að við skulum halda hvíldardaga okkar heilaga. Föstudagur í hverri viku er heilagur og tileinkaður honum, heilögum Núðluleika. Ekki skal vinna þá daga heldur treysta trúna og stúdera þann boðskap sem drottnari vor boðar.

Nú nálgast föstudagurinn og um að gera að gera ráðstafanir. Ef atvinnurekandi þinn ætlast til að þú vinnir á föstudaginn skaltu hringja þig inn veikan eða leysa föstudagsvinnuna út með því að vinna á sunnudaginn í staðin.

Trúmál og siðferði | Breytt s.d. kl. 18:32 | Slóð | Facebook | Athugasemdir (0)

25.7.2007 | 09:49

Almætti skrímslisins

Margir vantrúaðir einstaklingar vilja kasta rýrð á almátt Fljúgandi Spagettí Skrímslisins.

Kemur þá oft fram þessi spurning röktökumanna:
"Getur Guð skapað svo stóran kjöthleif að hann getur ekki lyft honum sjálfur?"

Grundvallarmisskilningurinn er sá að til sé s.k. þyngdarafl sem haldi kjöthleifinum niðri. Heilagur Núðluleiki notar mátt sinn til að halda öllum hlutum við jörðina. Ef hann á að skapa eitthvað svo stórt að hann geti ekki lyft því er hann að vinna gegn sjálfum sér, það getur hann ekki. Allt eins gætu menn spurt hvort hinn heilagi núðluleiki geti unnið sjálfan sig. Getur svart verið hvítt á sama tíma?

Megi spagettí meistarans fylgja ykkur og vernda!

Trúmál og siðferði | Slóð | Facebook | Athugasemdir (0)

24.7.2007 | 12:20

Skrímslið hefur samband

Það er alkunna að Spagettí Skrímslið Fljúgandi kemur skilaboðum sínum áleiðis gegnum útvalda, háa sem lága. Eðal sem meðalborna. Vitranir kunna að birtast fólki sem fyrirbæri sem sumir kunna að kalla engla, stundum birtist hann fólki í eigin mynd.

Ein slík birting hins heilaga núðluleika náðist á video:
http://www.youtube.com/watch?v=7hOyO2KVd_I